Sakura and Shakuntala
ಸಕುರಾ ಎಂಬ ಶಕುಂತಲೆಯ ನೆನಪು ಲೇಖಕ: ದಿನೇಶ ಕುಮಾರ ಶೆಟ್ಟಿ ತೆಕ್ಕಟ್ಟೆ ( Sakura and Shakuntala - English version is given below in the end ) ದಿನಕರ, ದಿನೇಶ ಸೂರ್ಯನಿಗಿರುವ ಅನ್ಯನಾಮಗಳು. ಜಪಾನನ್ನು ಸೂರ್ಯ ಹುಟ್ಟುವ ನಾಡು ಎನ್ನುತ್ತಾರೆ. ಕಾರ್ಯನಿಮಿತ್ತ ಜಪಾನಿಗೆ ನಾನು ನನ್ನ ಆಫೀಸಿನ ತಂಡದೊಂದಿಗೆ ತೆರಳಿದಾಗ ನನ್ನ ಗೆಳೆಯ ವಿಶ್ವನಾಥ - ನೀನು ನಿನ್ನ ತವರಿಗೆ ಭೆಟ್ಟಿಕೊಟ್ಟಂತಾಯಿತು ಎಂದ. ದಿನೇಶ ಅರ್ಥಾತ್- ದಿನದ ಒಡೆಯನು ಹುಟ್ಟಿದ ನಾಡಿಗೆ ಬಂದ- ಅಂದ! ಈ ಜಪಾನಿನಲ್ಲಿ ನನಗೆ ಪೌರತ್ವ ಕೊಟ್ಟಾರೆಯೇ - ಎಂದು ಕೇಳಿದರೆ, ಆತ - ಕೆಲವು ಸಮಯ ಇಲ್ಲಿಯೇ ಉಳಿದರೆ, ಇಲ್ಲಿನವಳೊಬ್ಬಳನ್ನು ಮದುವೆಯಾದರೆ ಕೊಟ್ಟಾರು - ಎಂದ! ನನ್ನ ಗೆಳೆಯ ವಿಶ್ವನಾಥ, ವಿಶಾಲ ಹೃದಯದವನು. ವಸುಧೈವ ಕುಟುಂಬಕಂ ಎಂಬ ಜಾತಿಯವ. ಇನ್ನೊಬ್ಬರ ಸಖ್ಯ ಬೆಳೆಸುವುದರಲ್ಲಿ ನಿಪುಣ. ಆತ ಕೆಲವು ವರ್ಷಗಳಿಂದ ಜಪಾನಿನಲ್ಲಿ ನೆಲೆಸಿದ್ದಾನೆ. ಜಪಾನೀ ಭಾಷೆಯನ್ನು ಕಲಿತು ಅಲ್ಲಿಯ ತರುಣಿಯೊಬ್ಬಳೊಂದಿಗೆ ಸಹಜೀವನ ನಡೆಸುತ್ತಿದ್ದಾನೆ. ಜಪಾನ್ ಒಂದು ವಿಚಿತ್ರ ದೇಶ ಎನಿಸಿತ್ತು ನನಗೆ. ಮನುಷ್ಯ ಹುಟ್ಟಿದ್ದೇ ದುಡಿಯಲು ಎಂದುಕೊಂಡಿದ್ದಾರೋ ಇಲ್ಲಿನವರು - ನಮ್ಮಲ್ಲಿ ಮೊದಲು ಕತ್ತೆ ಹುಟ್ಟಿದ್ದೇ ನಮ್ಮ ಚಾಕರಿ ಮಾಡಲು ಅಂದುಕೊಳ್ಳುತ್ತಿದ್ದರಲ್ಲ ಹಾಗೆ - ಎನಿಸಿತ್ತು. ಅದೇನೋ ಕೆಲಸದ ವ್ಯಸನ ಅವರಿಗೆ ಅನ್ನಬಹುದು. ಹೀಗೆ ಬಿಡುವಿಲ್ಲದೆ ದು...